လောကကြီးမှာ တခုလေ့ အလကားမရလတ်။ အလကားရရေလို့ထင်ကေလေ့ ကိုယ်မသိလိုက်ပဲနန့်ပီးဆပ်လိုက်ရရေ တန်ဖိုးက ကိုယ်ရယူထားစော်တိထက်တောင် များကောင်းများနိန်တတ်တေ ဆိုပါဝါ.. စီနီယာ အစ်မတယောက်ပြောရေအသံက နားထဲကိုစိမ့်လို့ဝင်ပါလတ်တေ။ အလုပ်သင်ခန်းထဲမှာ ဦးနှောက်ခြောက်ပါလားအောင် စိုဉ်းစားနိန်ရေအကြောင်းအရာတိကိုကျော်လို့ ယင်းစကားကဖြတ်ဝင်ပါလတ်စော်။ မဆီမဆိုင်ထိုင်စိုဉ်းစားဖို့ကျလားရေ။ စိုဉ်းစားယင်းစိုဉ်းစားယင်း ဟုတ်တုတ်တုတ်ပိုင်တွိလာရေ။
ကိုယ့်ကိုယ်ကိုမသိလိုက်ပဲ အလကားရယူထားစော်တိငါမှာလဲ သျှိနိန်ဗျာလ်လာဂု။ သျှိနိန်ဗျာလ်ဆိုကေ ငါဘားကဝါ.. ငါမသိလိုက်ရပဲ ငါပီးဆပ်လိုက်ရရေ အရာတိက ငါရယူထားစော်တိထက်ပင်များနိန်ဗျာလ်လား။ နဂိုကပင် ခြောက်နိန်ရေ ဦးနှောက်က ပိုလို့ခြောက်ချင်ချင်ခံပါလတ်တေ။ သဘာဝအရဆိုကေ ခြောက်ခမ်းနိန်ရေ နီရာတခုကို စိုပြေလာအောင် တခုခုလောင်းထည့်ပီးရရေ သဘောသဘာဝသျှိရေဆိုခါ ခြောက်နိန်ရေဦးနှောက်အတွက် ဆလိပ်တလိပ်လောက်ဖွာပလိုက်ကေ ပြန်စိုပြေလားဖို့လားဂု..။ စိုဉ်းစားမိပြန်ရေထော။ ဆလိပ်တလိပ်သောက်ဖို့အရေးလဲ.. ဦးနှောက်ကအလုပ်လုပ်ရရေကာဒေ။ (တချို့ဆိုကေ ကိုယ့်ရည်းစားဘားက ခွင့်ပြုချက်ကိုယူရရေဆိုယင့်..)
တရက်နိ သင်တန်းခန်းထဲမှာ ဆရာပြောရေအကြောင်းအရာတခုကို လားလို့အတွက်ပေါ်ပါလတ်ပြန်ရေ။ နောက်ဆယ်စုနှစ်တစုလောက်မှာ ကမ္ဘာကြီးစော် အိုင်ဒီယာခေတ်ဖြစ်ဖို့ဆိုယင့်။ ကိုယ်ခွန်အားနန့်လုပ်နိုင်စော်မှန်သမျှကို စက်ရုပ်တိနန့်အစားထိုးလာဖို့ဆိုခါ လူတိအတွက် အလုပ်လုပ်ဖို့က အိုင်ဒီယာစော်အရေးကြီးလာရေလတ်။ လူတိလုပ်ရဖို့စော်က အိုင်ဒီယာနန့်ရာအလုပ်လုပ်ရဖို့ဆိုကာ။ ယင်းအတွက် အဂုချိန်ကပင် အိုင်ဒီယာကိုအသုံးချတတ်အောင် စာအများကြီးဖတ်၊ ဖတ်မှတ်သမျှကိုလက်တွိနန့်ပေါင်းစပ်။ ပေါင်းစပ်လို့ရစော်ကို ချလုပ်လို့ဆိုပြန်ရေ။ ရင်ထဲမှာမွန်းကျပ်လားရေ။ ဆရာပြောစကားအဆုံးမှာ။ ကိုယ်က ဦးနှောက်နန့်အလုပ်လုပ်ရဖို့စော်လောက် မွန်းကျပ်စော်မတွိဖူး။ ဦးနှောက်ခြောက်စော်မှာလဲမပြောကေ့။ သင်တန်းသားတိထဲမှာက ကိုယ်ကအညံ့ဆုံးဆိုရေခါ ဆရာကလဲ စကားပြောကေ ကိုယ့်ကိုစီရာကြည့်လို့ပြောရေ။ ပြီးကေ ဦးနှောက်ကိုအသုံးချစော်မှာလဲ လွှာပနာ အသုံးချတတ်ရဖို့ဆိုပြန်ယင့်။ အူးးး..မလွယ်။
အဲ.. ပဇကလျှပ်တပြက်ထွက်ပါလတ်တေ.. စကားလုံးကို ဦးနှောက်ကပြန်စိုဉ်းစားဖို့ကျပြန်ရေထော။ ဒေ “မလွယ်” ဆိုရေစကားလုံးစော်။ ကောင်းကြီးကျယ်ပါရေဒေ။ လောကမှာ လွယ်ရေဆိုစော် ဇာတခုလေ့ မသျှိဆိုပနာ အချေခါကပင် ကြားဖူးနားဝသျှိခပါရေ။ ကောင်းလဲ အကျွမ်းတဝင်သျှိဖူးခရေ။ ဇာချင့်..ငပိဖုတ်စော်မှာတောင် ဆရာမပြကေ နည်းမကျ ဆိုရေစကားလုံးတိပါ့။ ငပိဖုတ်စော်မှာလေ့ နည်းမသိကေ မလွယ် ဆိုရေစကားကသျှိပြန်ပါသိရေမနား။ ယကေလေ့ လူတိုင်းလူတိုင်းနီးပါးလောက်လဲ ဒေမလွယ်ဆိုရေစကားကို အလွယ်တကူပြောတတ်ကတ်ပါရေ။ ကိုယ်ကိုယ်တိုင်လဲ အဂုထိပြောတုန်း။ ယကေလေ့ ဒေမလွယ်ဆိုရေစကားကို လူတိုင်းနီးပါးလောက်မကြိုက်ကတ်ပြန်ပါ။ ဇာဖြစ်လို့မလွယ်လေ..ဆိုရေစကားကြောင့် လို့ထင်ပါရေ။ အလုပ်လုပ်စော်မှာပဲဖြစ်ဖြစ်၊ စကားပြောစော်မှာပဲဖြစ်ဖြစ်၊ တိကျရေလူတိစော် ဒေမလွယ်ဆိုရေစကားကို လုံးဝနီးပါး မသုံးဖြစ်အောင် လေ့ကျင့်ပျိုးထောင်ပနာ လွယ်အောင်လုပ်တတ်ကတ်ပါ။ ယင်းပိုင်လုပ်နိုင်ရေလူတိစော် တရာမှာတယောက်၊ တထောင်မှာတယောက်၊ တသောင်းတသိန်းမှာတယောက်ပါ။ မလွယ်ဆိုစော်မှာလဲ ကိုယ်နန့်ဆိုင်ရာဆိုင်ရာ မလွယ်ရေကဏ္ဍတိသျှိတတ်ပါရေ။ ယင်းပိုင်မလွယ်စော်ကို လွယ်အောင်လုပ်တတ်တေလူတိက လူထဲကလူဇော်တိဖြစ်တတ်ပါရေ။ လူတိုင်းနီးပါး ပဇကတော့ကေ မလွယ်ဆိုစော်မသျှိ.. ဆိုပနာပြောတတ်ကတ်ကေလေ့။ လက်တွိကျကေ လွယ်အောင်မလုပ်နိုင်ပဲနန့် အသျှုံးပီးလားကတ်တေလူတိဂျဲပါဗျာလ်။ ဒေမလွယ်ဆိုရေစကားလုံးနောက်ကွယ်မှာ အရာထပ်ဆင့် မဖြစ်နိုင် ဆိုရေစကားက လိုက်ပါရေ။
ယင်းစကားလုံးကိုလေ့ လူတိကဆန့်ကျင်ကတ်ပြန်ပါရေ။ မဖြစ်နိုင်ဆိုစော် မသျှိဆိုပနာ အလွယ်ကာချေ ပြောချပလိုက်ကတ်ပြန်ပါရေ။ ဒေချင့်မှာလဲ စိုဉ်းစားစရာတိအများကြီးပါဝင်ပါရေ။ စိုဉ်းစားရဖို့စော်ကို သီဖို့လောက်အောင်ကြောက်တတ်တေ ကျွန်တော့်အတွက်ကတော့ကေ စိုဉ်းစားဖို့စော်တိဂျဲထပ်လို့ထပ်လို့ပေါ်လာပြန်ပါရေ။ သင်တန်းခန်းထဲက ဆရာပြောရေပိုင် အိုင်ဒီယာခေတ်အတွက် အဂုကတည်းကနိန်လေ့ကျင့်မှုလို့ပင်ဆိုရပါဖို့လား..။
ပြန်စကတ်ပါမေ..။ မဖြစ်နိုင်ဆိုရေစကားလုံးကို လူတိက ဆန့်ကျင်ကတ်ကေလေ့ မဖြစ်နိုင်ဆိုစော်ရေ ဒေလောက်ကြောက်ကောင်းထမန်းနည်းပညာပေါက်ကွဲမှုလွန်ကဲနိန်ရေခေတ်မှာတောင် ကျွန်တော်ရို့တိကို ချုပ်ကိုင်လွှမ်းမိုးနိန်တုန်းသိပါ။ ဟုတ်ပါလားမသိ။ ဇာအတွက်ကြောင့် ကျွန်တော်ရို့ကိုလွှမ်းမိုးနိန်ပါရေလဲ။ လွှမ်းမိုးနိန်နိုင်စော်ပါလဲ။ စိုဉ်းစားစရာတိပင် မဟုတ်ပါလား။ ဒေနိအချိန်ကျွန်တော်ရို့ကြုံတွိနိန်ရရေ လက်တွိဖြစ်စိုဉ်တိကို ထထဲဝဝင်လေ့လာကြည့်ကတ်ဖို့ဆိုကေ မဖြစ်နိုင်ဆိုစော်မသျှိ၊ မလွယ်ဆိုစော်မသျှိ ဆိုရေစကားလုံးကိုတတွင်ကျကျယ်ပြောနိန်ကတ်တေလူတိလဲ ယင်းလွှမ်းမိုးချုပ်ကိုင်မှုအောက်က ဂနိအချိန်ထိရုန်းမထွက် နိုင်ပဲ တဝဲဝဲလည်လည်နန့် မြုပ်နိန်ကတ်တုန်းပါ။ ဇာကြောင့်ပါလဲ။ မလွယ်ဆိုစော်က နည်းသိကေ အလွယ်ချေဖြစ်လားခစော်မှန်ကေလေ့ မဖြစ်နိုင်ဆိုစော်က ကိုယ်အား၊ ဥာဏ်အားတောင်မက ဇွဲလုံ့လဝီရိယပါ ပေါင်းစပ်နိုင်မှ ဖြစ်နိုင်ရေလို့ ဖြစ်လာပါဖို့စော်။ ယင်းအတွက် ဒေမဖြစ်နိုင်ဆိုရေ စကားလုံးစွာ ကောင်းကြီးကျယ်ရေလို့ပြောရစော်ပါ။ ကိုယ်အားဥာဏ်အားပေါင်းစပ်နိုင်ပြန်သိအုံ့ ဇွဲ၊လုံ့လဝီရိယမပြည့်စုံကေ မဖြစ်နိုင် ဆိုရေစကားလုံးချုပ်ကိုင်မှုကို မကျော်လွှားနိုင်ပါသိ။ ယင်းချင့်မှာ နောက်တခုလိုအပ်ပြန်ပါသိရေ။ ခံယူချက်နန့် ယုံကြည်ချက်။
ယင်းချင့်တိကိုပေါင်းစပ်နိုင်မှ ဒေဂနိအချိန် ကျွန်တော်ရို့ကြုံတွိနိန်ရရေ ခံစားနိန်ရရေ လက်တွိဖြစ်နိန်ရေ မဖြစ်နိုင်ဆိုရေ စကားလုံးကိုကျော်လွှားလွန်မြောက်နိုင်ပါလိမ့်မေ။ စကားအားဖြင့်နန့်တော့ မဖြစ်နိုင်ဆိုစော် မသျှိဆိုရေ အပြောအဟောတိက လွန်မြောက်နိုင်အောင် မှန်ထဲမှာမြင်နိန်ရပိုင်မြင်နိုင်ကတ်ပါစီလို့ တောင်းဆုပြုယင်း ဒေဂနိ စိုဉ်းစားမိသမျှကို ဒေနီရာမှ တခန်းရပ်လိုက်ရပါရေ။
အလွမ်းတကာ့အလွမ်းတိကိုထုတ်ပိုးသိမ်းဆည်းယင်း
မခံစားနိုင်လွန်းလို့ ရင်ထဲကပွင့်အံလာမှုတိကြောင့်
အချိန်မတိုင်ခင်ကတည်းကပင်
အော်မြည်နိန်မိရေ
ရိုးတောင်ထိပ်က
ရွှီဖိုးခေါင်
No comments:
Post a Comment